ដឹងពីការចូលធ្វើការនៅជប៉ុន

ចំណុចសំខាន់ក្នុងការធ្វើការនៅជប៉ុន

ជប៉ុនជាប្រទេស មានអនាម័យ មានសុវត្ថិភាព និងស្រួលរស់នៅ។ ឧស្សាហកម្មបានរីកលូតលាស់ជាមួយនឹងការរីកចំរើននៃសេដ្ឋកិច្ច ហើយថ្មីៗនេះមាននិស្សិតជាច្រើនដែលបញ្ចប់ការសិក្សានៅជប៉ុន មានបំណងចង់ធ្វើការនៅជប៉ុន ដើម្បីរៀនពីរបៀបធ្វើការនិង «ប្រព័ន្ធគ្រប់គ្រងគុណភាព»។ ដូច្នេះ យើងណែនាំពីអ្វីដែលគួរដឹងក្នុងការធ្វើការនៅជប៉ុន។

មូលហេតុដែលគេចង់បានធនធានមនុស្សអន្តរជាតិ

ធនធានមនុស្សឆ្នើមនិងប្លែក

នៅជប៉ុន ចំនួនក្មេងកាន់តែតិច មនុស្សចាស់កាន់តែច្រើន កំលាំងពលកម្មធ្វើការកាន់តែតិចទៅៗ។ ដូច្នេះហើយ ការទទួលយកធនធានមនុស្សអន្តរជាតិដែលពូកែ អោយបានច្រើន ជាកិច្ចការដែលត្រូវធ្វើដើម្បីអោយជប៉ុនមានដំណើរការល្អ។

ទន្ទឹមនឹងនេះដែរ ជាមួយនឹងសាកលភាវូនីយកម្ម គឺមានតម្រូវការធនធានមនុស្សអត្តរជាតិច្រើន ហើយក៏មានតម្រូវការជនបរទេសដែលមានវប្បធម៌កំណើតផ្សេងៗសំរាប់ធ្វើការក្នុងស្ថាប័នដើម្បីអោយមាន គំនិតប្លែកៗធ្វើអោយស្ថាប័នមានសកម្មភាពល្អ ដើម្បីបង្កើតអ្វីដែលមានតំលៃថ្មីៗ។

ហេតុដូច្នេះហើយ ទន្ទឹមនឹងការដែលមានជនបរទេសចង់ធ្វើការនៅជប៉ុនច្រើន ក៏មានក្រុមហ៊ុនជប៉ុនច្រើនដែលមានបំណងចង់ជួលជនបរទេសផងដែរ។

នៅពេលនោះ នៅពេលដែលនិស្សិតអន្តរជាតិចូលធ្វើការនៅជប៉ុន ត្រូវស្នើទៅការិយាល័យអន្តោប្រវេស្តន៍សុំប្ដូរទិដ្ឋាការពី «សិក្សា» ទៅ ទិដ្ឋាការដែលអាចធ្វើការបាន។ នៅឆ្នាំ 2010 មានការអនុញ្ញាតិចំនួន 7831 ករណី ហើយនៅឆ្នាំ 2015 មានចំនួន 15657 ករណី គឺបានកើនឡើងទ្វេរដងក្នុង 5 ឆ្នាំ (ការិយាល័យអន្តោប្រវេស្តន៍នៃក្រសួងយុត្តិធម៌ «ស្ថានភាពនៃការជួលនិស្សិតបរទេសអោយធ្វើការនៅក្រុមហ៊ុនជប៉ុន»)។ មានន័យថា ជនបរទេសដែលធ្វើការនៅជប៉ុនបានកើនឡើងយ៉ាងលឿន។

មូលហេតុដែលក្រុមហ៊ុនជប៉ុនចង់បានធនធានមនុស្សអន្តរជាតិ

«ក្រុមហ៊ុនជប៉ុន» នៅទីនេះមានន័យ ក្រុមហ៊ុនដែលដំណើរការនៅប្រទេសជប៉ុន។ នៅជប៉ុនមានក្រុមហ៊ុនប្រមាណ 382ម៉ឺនក្រុមហ៊ុន ដែលក្នុងចំណោមនោះ 99.7％ជាក្រុមហ៊ុនតូចឬមធ្យម។

ពីមុន ជាពិសេសក្នុងចំណោមក្រុមហ៊ុនតូចនិងមធ្យម ដោយសារចំនួនយុវជនថយចុះ ធ្វើអោយមានការលំបាកក្នុងការជួលជនជាតិជប៉ុនអោយធ្វើការ ទើបមានទំនោរជួលជនបរទេស។

ប៉ុន្តែនៅពេលដែលបានដឹងលឺទូលំទូលាយ ថាជនបរទេស មានសមត្ថភាពខ្ពស់ មានការអត់ធន់ខ្លាំង មានក្រុមហ៊ុនជប៉ុនជាច្រើនចាប់ផ្ដើមគិតថា «ចង់បានធនធានមនុស្សដែលមានសមត្ថភាពទាំងជនជាតិជប៉ុន និងជនបរទេស(មិនគិតសញ្ជាតិ)»។ បច្ចុប្បន្ននេះ មានក្រុមហ៊ុនជប៉ុនជាច្រើន បានចាប់ផ្ដើមផ្ដល់ការងារអោយជនបរទេស ដោយធ្វើអោយមានលក្ខខណ្ឌដូចគ្នានឹងជនជាតិជប៉ុន រួមទាំងការអប់រំ ការងារ ប្រាក់បំណាច់ ការឡើងឋានៈ។ល។

មូលហេតុដែលក្រុមហ៊ុនជប៉ុនចង់បានធនធានមនុស្សអន្តរជាតិ

«ក្រុមហ៊ុនដើមកំណើតជប៉ុន» គឺក្រុមហ៊ុនជប៉ុនដែករកស៊ីនៅក្រៅប្រទេស។ សំដៅលើក្រុមហ៊ុនដែលបានបង្កើតសាខានៅក្រៅប្រទេស ទោះបីជាក្រុហ៊ុនអន្តរជាតិ ប៉ុន្តែមាន ការិយាល័យកណ្ដាលនៅជប៉ុន។ ក្រុមហ៊ុនដើមកំណើតជប៉ុន ភាគច្រើនជាក្រុមហ៊ុនធំៗ។

ក្រុមហ៊ុនដើមកំណើតជប៉ុនធ្វើការរកស៊ីនៅគ្រប់កន្លែងលើពិភពលោក ដូច្នេះត្រូវការធនធានមនុស្សដែលយល់ពី ភាសានិងស្ថានការណ៍នៅប្រទេសនោះ។ ហេតុដូច្នេះហើយ មានការជួលជនបរទេសអោយគ្រប់គ្រងសាខាក្រៅប្រទេស ហើយក៏មានក្រុមហ៊ុនជាច្រើន ជួលជនបរទេស នៅពេលចាប់ផ្ដើមប្រតិបត្តិការក្រៅប្រទេស សំរាប់ការស្រាវជ្រាវទីផ្សារ និងការបង្កើតផលិតផលថ្មី។

នៅក្រុមហ៊ុនជប៉ុន ភាពប្លែកៗនៃធនធានមនុស្សដើម្បីអោយស្ថាប័នមានភាពរស់រវើក បាននឹងកំពុងទៅមុខ។ គឺគេសង្ឃឹមថា ជនជាតិជប៉ុននឹងទទួលឥទ្ធិពលល្អពីជនបរទេសដែលមានសមត្ថភាព និងធ្វើអោយស្ថាប័នមានភាពរស់រវើក។

ហេតុដូច្នេះហើយធនធានមនុស្សអន្តរជាតិ បានចូលធ្វើការច្រើនផ្នែកនៅក្រុមហ៊ុនជប៉ុន ក្នុងនាមជា«ធនធានមនុស្សមានសមត្ថភាព» ទោះបីជាក្រុមហ៊ុននោះមិនរកស៊ីនៅក្រៅប្រទេសក៏ដោយ។

លក្ខណសម្បត្តិធនធានមនុស្សអន្តរជាតិដែលគេចង់បាន

នៅជប៉ុនមានវិធីជួលបុគ្គលិកដ៏ប្លែកមួយគឺ «ជួលបុគ្គលិកទើបបញ្ចប់ការសិក្សាម្ដងច្រើននាក់»។ ជាទូទៅគឺជួលនិស្សិតបញ្ចប់ការសិក្សានៅសាលាជប៉ុននៅខែ 3 អោយចាប់ផ្ដើមចូលធ្វើការជាបុគ្គលិកថ្មីនៅខែ 4។ មានការជួលបុគ្គលិកដែលមានជំនាញស្រាប់ ប៉ុន្តែនៅជប៉ុន ភាគច្រើនគឺនៅតែជួលបុគ្គលិកទើបបញ្ចប់ការសិក្សា។ យើងធ្វើការបកស្រាយអំពី សមត្ថភាពភាសាជប៉ុន ដែលជាផ្នែកសំខាន់មួយនៃលក្ខណសម្បត្តិដែលគេចង់បានសំរាប់និស្សិតបរទេស។

សមត្ថភាពភាសាជប៉ុនដែលនឹងត្រូវសាកល្បងនៅពេលសម្ភាស–សមត្ថភាពនិយាយនិងសមត្ថភាពស្ដាប់

ក្នុងការស្វែងរកការងាររបស់ជនបរទេស ក្រុមហ៊ុនជប៉ុនសង្កត់ធ្ងន់លើសមត្ថភាពភាសាជប៉ុន។ គួរកត់សម្គាល់ថា ក្រុមហ៊ុនជប៉ុនមិនវិនិច្ឆ័យតែទៅលើលទ្ធផលនៃការប្រឡងបញ្ជាក់សមត្ថភាពភាសាជប៉ុនប៉ុណ្ណោះទេ។ នៅជប៉ុនមានក្រុមហ៊ុនច្រើនដែលសង្កត់ធ្ងន់លើការសម្ភាសន៍ដែលគេពិនិត្យមើលពីសមត្ថភាពនៃ«ការនិយាយ» និង «ការស្ដាប់» បើមិនគ្រប់គ្រាន់គឺមិនងាយជាប់ទេ។

ចំពោះជំនាញបច្ចេកទេសវិទ្យាសាស្ត្រមានករណីខ្លះមិនតម្រូវអោយចេះជប៉ុនច្រើនទេ

កំរិតភាសាជប៉ុនដែលគេចង់បានបន្ទាប់ពីចូលធ្វើការ អាចចែកជា 2 ប្រភេទធំៗ។ ទី1គឺអ្នកបច្ចេកទេសនិងអ្នកស្រាវជ្រាវដែលជាជំនាញផ្នែកវិទ្សាសាស្ត្រ ក្នុងករណីនេះ មានក្រុមហ៊ុនជាច្រើនគិតថា «អាចទទួលយកបានបើអាចប្រាស្រ័យទាក់ទងក្នុងក្រុមហ៊ុនបាន»។ ថ្មីៗនេះ បើសិនជាធនធានមនុស្សដែលមានជំនាញច្បាស់លាស់ផ្នែក IT ជាដើម មានក្រុមហ៊ុនជាច្រើនមិនផ្ដោតសំខាន់លើសមត្ថភាពភាសាជប៉ុនទេ។ ប៉ុន្តែ ទោះជាជំនាញខាងបច្ចេកទេសនិងស្រាវជ្រាវក៏ដោយ មានក្រុមហ៊ុនខ្លះតម្រូវអោយបង្កើនសមត្ថភាពភាសាជប៉ុនដែរ។

 នៅផ្នែកជំនួញគេត្រូវការសមត្ថភាពភាសាជប៉ុនខ្ពស់

ចំណែកឯការងារផ្នែកវិទ្សាសាស្ត្រសង្គមដូចជា ទីផ្សារ ផ្សព្វផ្សាយ រដ្ឋបាល។ល។ គឺតម្រូវអោយមានសមត្ថភាពភាសាជប៉ុនខ្ពស់ ដើម្បីប្រជុំជាមួយអតិថិជន និងក្រុមហ៊ុនសហការ ហើយចំពោះការងារទីផ្សារគឺត្រូវការទាក់ទងជាមួយមនុស្សនៅក្រៅក្រុមហ៊ុន និងលើកសំណើរ ចរចា។ល។ ខុសពីការសន្ទនាប្រចាំថ្ងៃ ភាសាជប៉ុនក្នុងការងារជំនួញគឺត្រូវចេះពាក្យសំរាប់ជំនួញ ពាក្យគួរសម និងអាចយល់ការសន្ទនាតាមបែបវប្បធម៌ជប៉ុន។

នៅក្នុងការសិក្សាក្នុងក្រុមហ៊ុនគេអាចបង្កើនសមត្ថភាពភាសាជប៉ុនបាន

បើមើលជាទូទៅ ការធ្វើការជាបុគ្គលិកក្រុមហ៊ុននៅជប៉ុន គឺតម្រូវអោយចេះភាសាជប៉ុនខ្លាំង។​ ប៉ុន្តែក្រុមហ៊ុនជប៉ុនមិនតំរូវអោយនិស្សិតបរទេសមានសមត្ថភាពកំរិតនោះតាំងពីដំបូងទេ។ ក្រុមហ៊ុនជប៉ុនភាគច្រើនមានគំនិតបណ្ដុះបណ្ដាលបុគ្គលិក«ចាប់ពីសូន្យទៅ» ដូច្នេះហើយបានត្រៀមកម្មវិធីបង្រៀន និងហ្វឹកហ្វឺនជាច្រើន។ ថ្មីៗនេះ មានក្រុមហ៊ុនច្រើនរៀបចំកម្មវិធីសិក្សាភាសាជប៉ុនសំរាប់និស្សិតបរទេសតាមកំរិត គឺអាចធ្វើការបណ្ដើរ បំប៉នភាសាបណ្ដើរបាន។